|
Naxçıvan Dövlət Universiteti Avropa, Asiya, Şərq
universitetləri ilə tərəfdaşlıqla yanaşı, bir
sıra beynəlxalq layihələrdə də fəal iştirak
edir. Elə bu məqsədlə Naxçıvan Dövlət
Universiteti, British Council, Naxçıvan MR
Təhsil Nazirliyi arasında üçtərəfli memorandum
imzalandı.
İmzalanma mərasimindən öncə universitetin
rektoru, akademik İsa Həbibbəyli müasir təhsil
sisteminin, modern tədris üsullarının tətbiqinin
əhəmiyyətindən danışdı. Rektor ölkəmizin dünya
miqyasında layiqincə tanıdılması üçün xarici
dillərin, xüsusilə də ingilis dilinin mükəmməl
öyrənilməsinin rolunu qeyd etdi.
British Councilin Azərbaycandakı ofisinin
direktoru Pol Klement çıxış edərək təmsil etdiyi
təşkilatın fəaliyyəti, "Gələcək uğura aparan
körpü" adlı layihə barədə məlumat verdi. Qeyd
olundu ki, layihənin məqsədi müəllim və
tələbələrin ingilis dili, habelə yeni
interaktiv üsul ilə tədris sahəsində bilik və
bacarıqlarını sınaqdan keçirməkdən
ibarətdir. Təlimlərdə Naxçıvan Dövlət
Universitetinin müəllimləri ilə yanaşı,
həmçinin ali məktəbdə ingilis dili ixtisası
üzrə təhsil alan IV kurs tələbələri və muxtar
respublikanın müxtəlif orta məktəb müəllimləri
də iştirak etmişlər. Yeni tədris ilinin
başlanması ilə layihənin seçim mərhələlərinə
start verilmişdir. Layihə rəhbəri Gülşən
Hüseynovanın, British Councilin təlimçiləri,
filologiya elmləri üzrə fəlsəfə doktorları
Nərminə Əliyeva və Məlahət Vəliyevanın
iştirakı ilə keçirilən müsahibəyə 80-ə yaxın
müəllim və tələbə qatılmışdı. İştirakçılardan
yalnız yüksək bilik və ünsiyyət bacarığı
nümayiş etdirən 40 nəfər seçilmişdir ki, onlar
oktyabr ayında 4 günlük treninqdə iştirak
edəcəklər. Treninqlərə qatılacaq müəllimlər
hazırladıqları mini layihələrini təqdim
edəcəklər. Ən uğurlu təqdimatlar British
Councilin sertifikatları ilə təltif olunacaq.
Yaxın gələcəkdə seçilən iştirakçıların
içərisindən iki ən yaxşı müəllim Naxçıvan
Dövlət Universitetinin və British Councilin
maliyyə dəstəyi ilə Böyük Britaniyada təlim
kurslarına göndəriləcək.
Mehriban SULTAN,
NDU-nun Mətbuat şöbəsinin müdiri |
